BRYGGJUHÁTÍÐ Á DRANGSNESI

Á hverju ári halda íbúar Drangsness Bryggjuhátíð, sem er hin besta skemmtun. Hún hefst jafnan með dorgveiðikeppni yngstu kynslóðarinnar um morguninn. Mörgum finnst sjávarréttasmakkið á frystihúsplaninu vera hápunktur hátíðarhaldanna, en þar standa grillmeistarar hreppsins og grilla grásleppur, saltfisk, krabba og önnur sjávarskrímsli handa gestum. Mynda- og sögusýningar eru jafnan í skólahúsinu og Bryggjuhátíðin endar með varðeldi við samkomuhúsið og dansleik fram á rauða nótt.

Drangsnes er eina þéttbýlið í Kaldrananeshreppi. Þar var byggð og tekin í notkun árið 2005 útisundlaug, heitir pottar, buslulaug og gufubað. Gistingu er hægt að fá á tveimur stöðum á Drangsnesi; í glæsilegri íbúð hjá Dóra og Sunnu og einnig í gistiheimilinu Malarhorni, en þar hefur verið byggð upp mikil ferðaþjónusta undanfarin ár.

Kaupfélag Steingrímsfjarðar rekur verslun í þorpinu og skammt frá henni er félagsheimilið Baldur. Þar er ágætt tjaldsvæði með góðri snyrtiaðstöðu. Ásbjörn Magnússon sér um að sigla með fólk út í Grímsey á bátnum Sundhana, en eyjan er skammt frá landi við Drangsnes.

© maí 2003 Jón Jónsson
(Uppfært 2005 af Arnari Jónssyni, 2007 af Jóni Jónssyni og 2009 af Arnari Jónssyni)

Hefur þú heimsótt Strandir nýlega?

Vefur: SÖGUSMIÐJAN
© 2003