Ásbjörn Magnússon og ferðaþjónustan Malarhorn halda úti áætlunarferðum í Grímsey frá Drangsnesi á bátnum Sundhana, en aðeins er 10 mínútna sigling í eyjuna. Gengið er um eyjuna með leiðsögn þar sem bæði sögu og fuglalífi er sérstakur gaumur gefinn. Þegar gott er veður er siglt í kringum Grímsey og sjóstöngin dregin fram. Ferðirnar eru gríðarlega vinsælar því heimsókn í Grímsey er engu lík. Óhemja er þar af lunda og öðrum fuglum. 

Grímsey á Steingrímsfirði er stærsta eyja fyrir Ströndum. Þjóðsagan segir að eyjan hafi orðið til þegar þrjú tröll ætluðu sér að grafa Vestfjarðarkjálkann frá meginlandinu og stofna þar tröllaríki. Í Grímsey var fyrrum býli og fram á 20. öld höfðu menn vetursetu þar og verbúðir. Í upphafi 20. aldar voru refir aldir í eyjunni og síðan veiddir þegar mest fékk fyrir skinnið af þeim. Í eyjunni var reistur viti 1915 og síðan endurbyggður 1949, eftir að Þjóðverjar höfðu eyðilagt hann með loftárás í síðari heimsstyrjöld.

Hér að neðan gefur að líta myndir úr Grímseyjarferð á Sundhana á Bryggjuhátíð 2004. Síðan þá hefur aðstaða til landgöngu verið bætt verulega.