HÓLMAVÍK VIÐ STEINGRÍMSFJÖRÐ

Hólmavík er líflegt og skemmtilegt tæplega 400 manna kauptún við Steingrímsfjörð á Ströndum, í aðeins 270 km fjarlægð frá Reykjavík. Íbúarnir í sveitunum í kring um Hólmavík lifa á sauðfjárrækt, en í þorpinu snýst atvinnan að miklu leyti um sjávarútveg og þjónustu. Oft er sagt að á Ströndum búi kraftmikið fólk sem sé í góðum tengslum við náttúruna og eru það orð að sönnu.

Á Hólmavík er margt að sjá og skoða. Nýleg 25 metra sundlaug, náttúrufegurð, fjölbreytt menningar- og mannlíf, golfvöllur, mótorcrossbraut, skemmtilegar gönguleiðir, handverk heimamanna, frábær veitingastaður og bar, skemmtilegar sýningar, skjól- og rúmgott tjaldsvæði eru meðal þess sem er í boði fyrir ferðamenn sem leggja leið sína til Hólmavíkur. 

Hólmavík er paradís fyrir unnendur fallegrar náttúru. Þorpið stendur við sjóinn undir Kálfanesborgunum sem halda því undir sínum verndarvæng. Um Borgirnar er hægt að ganga eftir göngustíg sem hefur verið mjög vinsæll síðustu ár og var lagaður mikið árið 2009. Göngugarpar geta skráð nöfn sín í gestabók sem er staðsett á hæsta hjalla leiðarinnar.

Það er margt sem heillar á Hólmavík. Sumarið 2004 var tekin í notkun glæsileg 25 metra sundlaug með allr aðstöðu eins og hún gerist best. Auk sundlaugarinnar, sem er rétt hjá tjaldsvæðinu og Upplýsingamiðstöðinni, eru í boði tveir heitir pottar fyrir pottormana og buslulaug fyrir börn á öllum aldri.

Elsta byggingin á Hólmavík er Riis-hús. Það var byggt árið 1897 af dönskum kaupmanni, Richard P. Riis. Þar er veitingastaðurinn og barinn Café Riis staðsettur, en hann er þægilegur staður í hjarta bæjarins. Húsið er glæsilega innréttað og býður upp á matseðil sem enginn ætti að verða svikinn af. Þá er oft gaman að kíkja þangað um helgar, fá sér í könnu og spjalla við heimamenn eða skoða myndasýningu sem sýnir mannlíf á Hólmavík.

Tveir minnisvarðar eru á Hólmavík, inni í þorpinu er minnismerki um Stefán frá Hvítadal á fæðingarstað hans, en Stefán var fyrsti innfæddi Hólmvíkingurinn. Þá hefur Hermanni Jónassyni, fyrrverandi þingmanni Strandamanna, verið reistur minnisvarði í Hermannslundi í landi Skeljavíkur, skammt utan Hólmavíkur.

Það orð hefur lengi farið af Strandamönnum að þeir kunni sitthvað meira fyrir sér í göldrum en aðrir. Á Hólmavík er hægt að heimsækja Galdrasýningu sem er kynngimögnuð ferð um dularheima galdra og kukls. Á sýningunni er fjallað á faglegan hátt um galdramál 17. aldar á Íslandi og þjóðtrú Íslendinga. Á sama stað er að finna kaffihúsið Kaffi Galdur þar sem má smakka kynngimagnaðar kökur og kruðerí.

Sauðfjársetur á Ströndum er staðsett í félagsheimilinu Sævangi, 12 km sunnan við Hólmavík. Þar getur fólk fræðst um sögu íslensku sauðkindarinnar á skemmtilegri og lifandi sýningu, auk þess sem þar er hægt að fá sér kaffi og heimilislegt íslenskt meðlæti í notalegri kaffistofu sem ber heitið Kaffi Kind. Í Sævangi er einnig rekin handverksbúð og á sumrin eru þar heimalningar sem börnin fá að taka þátt í að gefa.

Gistimöguleikar á og við Hólmavík eru nokkrir. Gistiheimilið á Borgabraut er rótgróið gistiheimili í eldri hluta þorpsins og heimagisting stendur líka til boða í Steinhúsinu, sem er elsta steypta húsið á Hólmavík. Ferðaþjónustan Kirkjuból er gistihús á bænum Kirkjubóli nokkuð sunnan við Hólmavík, þar er skemmtileg gönguleið og góð leikaðstaða fyrir börn.

Fyrir þá sem gista í tjaldi er gott tjaldsvæði rétt við Upplýsingamiðstöðina á Hólmavík sem er opin yfir sumartímann í félagsheimilinu á staðnum. Á Upplýsingamiðstöðinni geta ferðalangar nálgast allar upplýsingar um afþreyingu á svæðinu og þar er einnig hægt að kíkja á internetið, fá sér kaffi o.fl.

Nóg er af annarri afþreyingu. Hægt að fara á sjóstöng eða í siglingu og náttúruskoðun hjá Gistiheimilinu á Brogabraut og Strandahestar sérhæfa sig í styttri hestaferðum í nágrenni Hólmavíkur. Golfáhugamenn geta skellt sér í golf á ágætum níu holu golfvelli sem er í Skeljavík rétt fyrir utan Hólmavík og þeir sem vilja aðeins meiri læti geta skellt sér í mótorkrossgallann og rúnatð um á Skeljavíkurbraut sem er í grennd við þorpið.

Hólmavík er áfangastaður þeirra sem eru að leita að friði og ró, fallegri náttúru, gestrisni og vandaðri afþreyingu.

© júní 2003 (uppfært 2009)
Jón Jónsson og Arnar S. Jónsson

Hefur þú heimsótt Strandir nýlega?

Vefur: SÖGUSMIÐJAN
© 2003