|
|
|
|||||
|
|
|
Það er ekki beinlínis auðvelt að ferðast um Strandir ef maður er ekki á eigin bíl eða í skipulagðri hópferð. Þó standa mönnum nokkrir kostir til boða: Flug - áætlun Áætlunarflug er á Gjögur í Árrneshreppi frá Reykjavík, tvisvar í viku, Flugfélagið Ernir sér um það. Flugvöllur er líka á Hólmavík, en ekki er áætlunarflug þangað. Nokkuð er hins vegar um að flugkappar á minni vélum staldri við á Hólmavík á sumrin. Rútuferðir - áætlun Yfir sumartímann eru rútuferðir í boði 3 daga í viku, sunnudaga, þriðjudaga og föstudaga, á vegum Stjörnubíla á Ísafirði, á leiðinni:
Yfir veturinn er rúta á vegum Trex á föstudögum norður Strandir, frá Brú til Hólmavíkur og áfram á Drangsness ef bókað er fyrirfram. Síðan er ekin sama leið til baka samdægurs. Yfir sumarið eru rútuferðir á sömu leið þrisvar í viku, sunnudaga, þriðjudaga og föstudaga. Þessar ferðir eru í tengslum við rútuferðir milli Akureyrar og Reykjavíkur.
Þeir sem ætla að halda í ferðalag til Hólmavíkur og Stranda ættu að fylgjast vel með fréttum af veðri og ástandi vega, sérstaklega yfir veturinn og nálægar árstíðir. Nauðsynlegt er einnig að fylgjast vel með opnun fjallvega á vorin því ekkert er leiðinlegra en að sitja fastur í miðju ferðalagi. Upplýsingavefur Vegagerðarinnar um færð á vegum er afar gott hjálpartæki í þessu sambandi og einnig er hægt að hringja í þjónustusíma Vegagerðarinnar, 1777. Til að komast norður til Hólmavíkur þarf að beygja af hringveginum við N1 Staðarskála í Hrútafirði. Vegurinn þaðan (Djúpvegur, nr. 61) liggur um sunnanverðar Strandir til Hólmavíkur. Hann er yfirleitt ágætur yfirferðar og búið er að leggja bundið slitlag á um 70% vegarins. Hæsti punktur á leiðinni til Hólmavíkur er 290 m yfir sjávarmáli á Ennishálsi milli Bitru og Kollafjarðar. Þar eru varasamar beygjur í bröttum hálsinum. Stikuháls á milli Hrútafjarðar og Bitru er mun lægri eða 165 m. Rétt er að benda á að Djúpvegur hættir að vera aðalleið þeirra sem eru að koma af Vesturlandi í ágúst 2009 þegar vegurinn um Arnkötludal opnar, en áfram verður styttra fyrir þá sem eru að koma af Norðurlandi að keyra Strandirnar. Vegurinn vestan frá Ísafirði um Djúp og Steingímsfjarðarheiði til Hólmavíkur (Djúpvegur, nr 61) hefur tekið miklum framförum síðustu ár, enda hefur mikið verið unnið í honum. Lögð hefur verið klæðning á mestan hluta leiðarinnar og hún verður öll malbikuð þegar ný og glæsileg brú yfir Mjóafjörð opnar árið 2009. Vegurinn frá Ísafirði á Hólmavík liggur hæst á Steingrímsfjarðarheiði - 439 m yfir sjávarmál. - Laxárdalsheiði - vegur nr. 59 Laxárdalsheiði er 35 km langur heilsársvegur frá Búðardal yfir í Hrútafjörð, kemur niður 2 km norðan við Borðeyri. Hann liggur hæst í 200 m hæð yfir sjávarmáli. Vegurinn er ekki með bundnu slitlagi. - Steinadalsheiði - vegur nr. 69 (sumarvegur) Steinadalsheiði (vegur nr. 69 - 29 km milli vega nr. 60 og 61) liggur frá Vestfjarðaveg nr. 60 við sunnanverða Gilsfjarðarbrúna, inn með Gilsfirði og upp úr botni fjarðarins yfir Steinadalsheiði niður í botn Kollafjarðar. Leiðin er einungis sumarvegur og er ekki við hæfi lágra fólksbíla. Fara þarf yfir tvö lítil vöð á leiðinni og lítil umferð er um veginn á sumrin. Steinadalsheiði er 330 m há. - Tröllatunguheiði - vegur nr. 605 (sumarvegur) Tröllatunguheiði (vegur nr. 605 - 26 km) liggur úr norðanverðum Gilsfirði (frá Króksfjarðarnesi við norðanverða Gilsfjarðarbrú) yfir á Strandir og kemur niður 7 kílómetrum sunnan við Hólmavík. Tröllatunguheiði er ágætur en seinfarinn sumarvegur, fær öllum bílum. Talsverð umferð er yfir heiðina yfir sumarið. Fyrir smábíla er oft frekar mælt með Tröllatunguheiði en Steinadalsheiði af leiðum sem koma niður sunnan Hólmavíkur, þó hún sé brött að vestanverðu. Tröllatunguheiði er 420 m há. - Þorskafjarðarheiði - vegur nr. 608 (sumarvegur) Þorskafjarðarheiði (vegur nr. 608 - 23 km) liggur frá Vestfjarðavegi (nr. 60) úr botni Þorskafjarðar og upp á heiðina og þar inn á aðalveginn á miðri Steingrímsfjarðarheiði (Djúpveg, nr. 61). Ef stefnan hefur verið tekin til Hólmavíkur er ekið þaðan niður í Staðardal innst í Steingrímsfirði á Ströndum. Þar koma menn að vegamótum 11 km norðan við Hólmavík og geta þar valið um að aka norður Strandir og á Drangsnes eða áfram suður til Hólmavíkur. Þeir sem koma til Hólmavíkur af Barðaströndinni koma yfirleitt um Tröllatunguheiði eða Þorskafjarðarheiði yfir sumartímann, en þurfa að keyra suður á Laxárdalsheiði yfir veturinn. Þorskafjarðarheiði er ágætur sumarvegur og hún er 490 m há. Vegir á Ströndum norðan Hólmavíkur eru misjafnir. Stysta leið norður í Árneshrepp frá vegamótum í Staðardal og um Bjarnarfjarðarháls (vegur nr. 643), en ef nægur tími er fyrir hendi er gaman að sleppa hálsinum á annarri leiðinni og aka hringleiðina út á Drangsnes í staðinn (nr. 645). Vegurinn um Bjarnarfjarðarháls (180 m hæð yfir sjávarmáli) er stuttur en varasamur, blindhæðir og beygjur setja svip á hann. Vegurinn norður í Árneshrepp liggur um annan lágan háls, Veiðileysuháls, sem er 220 m hár. Kaflar á veginum norður í Árneshrepp, norðan Bjarnarfjarðar, hafa verið lagaðir mikið á síðustu árum, en á milli eru gamlir vegir þar sem sýna þarf aðgætni. Þar þarf að fara hægt yfir, sem er reyndar í góðu lagi því landslagið er sérstakt og margt ber fyrir augu. Hið sama gildir um veginn frá Djúpavík að Gjögri, en innansveitar í Árneshreppi er hins vegar ágætur malarvegur. Vegir færir öllum bílum ná lengst í norður að bæjunum Felli og Munaðarnesi og þriðji vegurinn liggur svo að Eyri í Ingólfsfirði. Frá Eyri liggur jeppavegur áfram að Ófeigsfirði, en norðar fara engin vélknúin farartæki nema bátar. Hvergi á Strandavegi (nr. 643) er bundið slitlag, allt frá Staðará í Steingrímsfirði og norður í Árneshrepp. Á veturna lokast vegurinn norður í Árneshrepp ef veður eru vond og er oft ekki opnaður í nokkra mánuði. Þetta er breytilegt eftir árum, eftir því hve snjóþungt er. Eins er vegurinn yfir Bjarnarfjarðarháls stundum lokaður um lengri eða skemmri tíma yfir veturinn. Leiðin
út á Drangsnes (vegur nr. 645) um Selströnd hefur verið lagfærð
mikið á síðustu árum og er
ágætur vegur mestan hluta af leiðinni, lagður bundnu slitlagi að mestu. |
|
Djúpvegur
- vegur nr. 61 |
...en áfram skröltir hann þó! |
Vefur:
SÖGUSMIÐJAN |
||